Սեպտեմբերի 15֊ին՝ 17:30֊ին, WTC Երևանը կհյուրընկալի Թիմաթի Մաքֆարլեյնին` որակավորված ճարտարագետ, ով հանդիսանում է «Institution of Structural Engineers»֊ի անդամ, «Royal Institute of British Architects»֊ի պատվավոր անդամ, «Royal Incorporation of Architects in Scotland»֊ի պատվավոր անդամ, ինչպես նաև ունի «Royal Designer for Industry» կոչում:

Քննարկման հիմնական թեմաները

• Ապակու արտադրության զարգացման կարևորագույն փուլեր
• Կանոնների վրա հիմնված նախագծում․ առավելություններ և սահմանափակումներ
• Երաշխիքներ, թե՞ մասնագիտական պատասխանատվություն
• Ոլորտի առջև ծառացած մարտահրավերներ

‍Նեթվորքինգ՝ 17:30 | Բանախոսություն՝ 18:00

Լեզու՝ անգլերեն

Հուլիսի 22֊ին՝ 17:30֊ին, WTC Երևանը հյուրընկալեց eqwefy ԿԲ-ի կողմից լիցենզավորված ներդրումային ընկերության գլխավոր տնօրեն, Հարվարդի բիզնես դպրոցի շրջանավարտ Սամսոն Ավետյանին՝ քննարկելու Հայաստանի տնտեսական ապագան։

Հայաստանի երկարաժամկետ տնտեսական զարգացման ուղին փոխվում է․ այն գործոնները, որոնք պայմանավորել են այդ աճը, այլևս արդիական չեն: Տնտեսական զարգացումը կախված է լինելու համաշխարհային շուկայում մրցունակ տեխնոլոգիական ընկերություններ ստեղծելու կարողությունից։ Սակայն դրա համար միայն ձեռնարկատիրական ներուժը բավարար չէ. անհրաժեշտ է նաև համապատասխան ֆինանսական ենթակառուցվածք, որը կկարողանա ապահովել նորարարության ֆինանսավորումը զարգացման բոլոր փուլերում։

Հանդիպման ընթացքում քննարկեցինք Հայաստանի տնտեսության կառուցվածքային առանձնահատկությունները, տեխնոլոգիաների ռազմավարական նշանակությունը: Անդրադարձանք, թե ինչպես են վենչուրային ֆինանսավորումը և մասնավոր կապիտալի շուկաների զարգացումը դառնում երկրի երկարաժամկետ տնտեսական մրցունակության կարևոր նախապայմաններ։

Քննարկման հիմնական թեմաները

• Հայաստանի տնտեսության կառուցվածքային առավելություններն ու սահմանափակումները։
• Ինչու են տեխնոլոգիաները դառնում Հայաստանի կարևորագույն մրցակցային առավելություններից մեկը։
• Ինչպես են աշխարհի հաջողակ նորարարական էկոհամակարգերը ֆինանսավորվում։
• Ինչու միայն ավանդական բանկային համակարգը չի կարող ապահովել նորարարության վրա հիմնված տնտեսական աճի ֆինանսավորումը։
• Վենչուրային կապիտալի, մասնավոր ներդրումային կապիտալի և երկարաժամկետ ռիսկային կապիտալի դերը։
• Գործնական հետևություններ ղեկավարների, ընկերությունների, ներդրողների և քաղաքականություն մշակողների համար։

‍Նեթվորքինգ՝ 17:30 | Բանախոսություն՝ 18:00

Լեզու՝ հայերեն

Հունիսի 18֊ին՝ 17:30֊ին, WTC Երևանը հյուրընկալեց լեռնագնաց և Արևի հյուրատան հիմնադիր Գևորգ Գասպարյանին, ով հաղթահարել է բազմաթիվ բարձունքներ, այդ թվում՝ Էվերեստը:

Գևորգի հետ խոսեցինք լեռնագնացությունից դեպի կյանք և վերելք: Հաղթահարելով Էվերեստի գագաթը՝ Գևորգը համոզված է, որ այդ ճանապարհը միայն ֆիզիկական մարտահրավեր չէ, այլ արժեքավոր փորձ, որը ձևավորում է մարդու մտածելակերպը, ազդում նրա առօրյա կյանքի և բիզնես գործունեության վրա։ Այս ճանապարհը սովորեցնում է սահմանել նպատակներ, հաղթահարել դժվարությունները՝ զարգացնելով առաջնորդության, պատասխանատվության և շարունակական աճի կարևոր հմտությունները։

Գևորգը սկսել է զբաղվել տուրիզմով 2009թ․, իսկ 2011թ․ նաև լեռնային տուրիզմով։ 2012թ․ առաջին անգամ բարձրացել է Արարատ լեռը, 2013թ․՝ Դամավանդը, այնուհետև Կազբեկ, էլբրուս, Մոնբլան, Այլենդ պիկ, Կիլիմանջարո, Խան֊Թենգրի, Ակոնկագուա, Մաթերհորն և Էվերեստ։ 2018թ․ Վայոց ձորի Եղեգիս գյուղում հիմնել է Արևի հյուրատունը, իսկ 2023թ․՝ համանուն հյուրատուն Տավուշի մարզի Գոշ գյուղում։ Գևորգի հիմնական աշխատանքը ներկայումս արկածային տուրիզմն է:

‍

‍Նեթվորքինգ՝ 17:30 | Բանախոսություն՝ 18:00

Լեզու՝ հայերեն

Մայիսի 26֊ին՝ 17:30֊ին, WTC Երևանը հյուրընկալեց Տեղեկատվական համակարգերի կարգավորման հանձնաժողովի նախագահ Ներսես Երիցյանին, ով ներկայացրեց Հայաստանի թվայնացման բարեփոխումների ընթացքը և դրանց դերը տնտեսական մրցունակության բարձրացման ու պետական ծառայությունների վերափոխման գործընթացում։ Քննարկվեցին Հայաստանի կողմից ձևավորվող վստահելի թվային ենթակառուցվածքները՝ թվային նույնականացում, էլեկտրոնային ստորագրություն, տվյալների փոխգործունակություն, տվյալների կառավարում, կիբեռանվտանգություն և միասնական թվային հարթակներ, որոնք միտված են նվազեցնելու բիզնեսի վարչարարական բեռը, գործարքային ծախսերը և ծառայությունների մատուցումը դարձնելու առավել արագ ու կանխատեսելի։

Հանդիպմանը անդրադարձանք նաև «կյանքային իրադարձությունների» վրա հիմնված թվային ծառայությունների զարգացմանը, թվային ավտոմեքենայի սեփականության փոխանցման առաջին գործնական օրինակին, ինչպես նաև մասնավոր հատվածի աճող դերակատարմանը՝ PPP, GovTech, cloud, AI և տվյալահեն ծառայությունների զարգացման համատեքստում։ Ելույթը ներկայացրեց Հայաստանի տեսլականը անվտանգ, փոխկապակցված և մրցունակ թվային տնտեսության ձևավորման ուղղությամբ։

‍Նեթվորքինգ՝ 17:30 | Բանախոսություն՝ 18:00

Լեզու՝ հայերեն

Ապրիլի 30֊ին՝ 17:30֊ին, WTC Երևանը յուրընկալեց Հրայր Ասլանյանին՝ «Ամունդի-ԱԿԲԱ Ասեթ Մենեջմենթ» ընկերության Գլխավոր ներդրումային տնօրեն, Գլխավոր տնօրենի տեղակալ՝ հետաքրքիր զրույցի, թե ինչպես են աշխարհաքաղաքական իրադարձությունները վերափոխում գլոբալ մակրոտնտեսական և շուկայական հեռանկարները: Հանդիպմանը նաև անդրադարձ կատարվեց «վերահսկվող խառնաշփոթ» նոր միջավայրին, որտեղ աշխարհաքաղաքականությունը, էներգիայի գները, գնաճի դինամիկան և կենտրոնական բանկերի արձագանքները ձևավորում են ներդրումային պայմանները։

Քննարկմանը ներկայացվեցին նաև Ամունդի-ԱԿԲԱ ընկերության 2026թ. ապրիլի ներդրումային մոտեցումները՝ ընդգծելով դիվերսիֆիկացիայի կարևորությունը, արհեստական բանականության և տեխնոլոգիական վերափոխման ընձեռած հնարավորությունները, ինչպես նաև զարգացող շուկաների հարաբերական գրավչությունը։ Այդ թվում ներկայացվեցին Հայաստանում կենսաթոշակային ֆոնդերի շուկայի զարգացման միտումները։

Հրայր Ասլանյանն ունի տնտեսագիտության թեկնածուի գիտական աստիճան ԵՊՏՀ-ից։ Նա հանդիսանում է CFA որակավորում ունեցող ֆինանսական վերլուծաբան և CFA ինստիտուտի անդամ։

Նեթվորքինգ՝ 17:30 | Բանախոսություն՝ 18:00

Լեզու՝ հայերեն

Ապրիլի 16֊ին՝ 17:30֊ին, WTC Երևանը հյուրընկալեց ՀՀ առողջապահության նախարար Անահիտ Ավանեսյանին՝ քննարկելու համընդհանուր առողջապահական ծածկույթի բարեփոխումների առաջին 100 օրերի շուրջ՝ ներկայացնելով փոփոխությունները, նախնական արդյունքները և հանրային արձագանքը։

Հանդիպմանն անդրադարձ կատարվեց Հայաստանի առողջապահական համակարգի ներկա վիճակին՝ ներառյալ ծառայությունների հասանելիության, ֆինանսական պաշտպանության և մարդկային կապիտալի հետ կապված մարտահրավերները։ Ներկայացվեցին ծառայությունների մատուցման արդիականացման, առաջնային բուժօգնության ամրապնդման, ինչպես նաև համակարգի արդյունավետության և որակի բարձրացմանն ուղղված հիմնական բարեփոխումները։

Անդրադարձ կատարվեց նաև, թե ինչպես են այս բարեփոխումները նպաստում մարդկային կապիտալի զարգացմանը՝ բարելավելով առողջապահական ցուցանիշները և բարձրացնելով բնակչության արդյունավետությունը։ Քննարկվեցին բարեփոխումների հետագա ուղղությունները՝ ներառյալ համակարգի կայունության ապահովումը, թվային ինտեգրումը և ծառայությունների մատուցման զարգացող մոդելները։

Առանձին ուշադրություն դարձվեց համընդհանուր առողջապահական ապահովագրության ներդրմանը՝ որպես առանցքային քայլ՝ ուղղված ծածկույթի ընդլայնմանը, ֆինանսական պաշտպանության ամրապնդմանը և հիմնական առողջապահական ծառայությունների նկատմամբ հավասար հասանելիության ապահովմանը։

Նեթվորքինգ՝ 17:30 | Բանախոսություն՝ 18:00

Լեզու՝ հայերեն

‍

Մարտի 17֊ին՝ 17:30֊ին, WTC Երևանը հյուրընկալեց Լեա Հակիմին՝ Համաշխարհային բանկի Եվրոպայի և Կենտրոնական Ասիայի երկրների առաջատար տնտեսագետին։

2022-2023թթ․ Հայաստանը զգալի տնտեսական աճ գրանցեց՝ պայմանավորված ժամանակավոր գործոններով: Քանի որ դրանց ազգեցությունը աստիճանաբար նվազում է, կայուն աճ պահպանելու նպատակով անհրաժեշտ է հաղթահարել կառուցվածքային խոչընդոտները: Հանդիպմանը անդրադարձ կատարվեց մրցակցային շուկաներին, առևտրային և ներդրումային միջավայրին՝ որպես Հայաստանի տնտեսական զարգացման հաջորդ փուլի առանցքային ուղղություններ:

Լեան ունի շուրջ 20 տարվա փորձ կառավարություններին տնտեսական հարցերի շուրջ խորհրդատվություն տրամադրելու ոլորտում՝ ներառյալ մակրոտնտեսությունը, հարկաբյուջետային (ֆիսկալ) քաղաքականությունը, տնտեսական աճը և պետական պարտքի կառավարումը։ Նա աշխատել է Լիբանանի Ֆինանսների նախարարի գրասենյակում՝ զբաղվելով մակրոֆիսկալ քաղաքականությամբ և միջազգային կապիտալի շուկաներում պարտատոմսերի թողարկմամբ։ Լեան ունի Եյլի համալսարանի զարգացման և միջազգային տնտեսագիտության մագիստրոսի աստիճան։

Նեթվորքինգ՝ 17:30 | Բանախոսություն՝ 18:00

Լեզու՝ անգլերեն

Փետրվարի 26-ին` 17:30-ին, WTC Երևանը հյուրընկալեց Խուան Բ. Ֆրիգերիոյին՝ առաջատար ճարտարապետ, բազմաթիվ մրցանակների արժանացած նախագծերի հեղինակ, ով նաև հանդիսանում է Foster + Partners ընկերության գործընկեր Լատինական Ամերիկայում։

Խուանը ղեկավարել է Բուենոս Այրեսի քաղաքապետարանի շենքի նախագծումը, որը դարձել է քաղաքի ճարտարապետական խորհրդանիշներից մեկը։ Խուանը միացել է Foster + Partners-ի Լոնդոնի գրասենյակին 2000թ․ Հարվարդի բիզնես դպրոցն ավարտելուց և Բուենոս Այրեսում, Նյու Յորքում և Բոստոնում աշխատելուց հետո։ Նա ակտիվորեն ներգրավված է եղել Wembley ազգային մարզադաշտի նախագծման աշխատանքներում։

Վերջերս Խուանը նաև սկսել է WTC Երևան բազմաֆունկցիոնալ համալիրի նախագծումը Հայաստանում։ Նա հաճախակի հանդես է գալիս որպես բանախոս՝ կայուն ճարտարապետության և քաղաքային նախագծման թեմայով միջոցառումներում։

Լեզու՝ անգլերեն

Ծախսերի գծով անկախ խորհրդատու֊փորձագետի նշանակում

Շինարարական նախագծերի ծախսերը կարող են զգալի ֆինանսական բեռ առաջացնել Պատվիրատուի բիզնես ծրագրի համար, եթե դրանք արդյունավետորեն չկառավարվեն, չվերահսկվեն նախագծի ողջ ընթացքում։ Դեռևս վաղ փուլում ծախսերի գծով անկախ խորհրդատու֊փորձագետի ներգրավումը թույլ է տալիս կանխել նման ռիսկերը և ապահովել ծախսերի վերահսկելիությունն ու թափանցիկությունը։

Փետրվարի 25-ին՝ ժամը 17:30-ին, WTC Երևանը հյուրընկալեց Լուայ Ազամին՝ NEA ընկերության գործառնական տնօրենին։ NEA-ն առաջարկում է մասնագիտացված խորհրդատվական համապարփակ ծառայություններ՝ ներառյալ ծախսերի կառավարում, քանակային գնահատում և նախագծերի կառավարում՝ պետական և մասնավոր հատվածի կազմակերպությունների համար։

Լեզու՝ անգլերեն

Փետրվարի 18-ին WTC Երևանը հյուրընկալեց Սեբաստիան Վիթթին և դոկտոր Գերդ Վեբերին, ովքեր ներկայացնում են JWC-ն՝ կառավարման խորհրդատվական համաշխարհային առաջատար ընկերությունը, որը մասնագիտացած է ցուցահանդեսների, առևտրային տոնավաճառների և համաժողովների ոլորտում։

Խոսնակները կներկայացնեն MICE (Հանդիպումներ, խրախուսական ծրագրեր, համաժողովներ և ցուցահանդեսներ) ոլորտի հիմունքները, պետական մարմինների դերը և հանրային հատվածի ներգրավվածությունը MICE էկոհամակարգի ձևավորման և զարգացման գործում, Երևանի՝ որպես MICE ուղղության գրավչության գնահատումը:

Փետրվարի 17-ին WTC Երևանը հյուրընկալեց համաշխարհային առաջատար խորհրդատվական ընկերության՝ Alvarez & Marsal-ի փորձառու մասնագետներին, ովքեր ներկայացրին բիզնեսի փոխակերպման, գործառնական արդյունավետության բարձրացման և աճի խթանման գործնական մոտեցումներ, ինչպես նաև միջազգային կապիտալի ներգրավման ռազմավարություններ։

Քննարկման ընթացքում անդրադարձ կատարվեց նախագծային ֆինանսավորման հիմնական միտումներին, Եվրոպայից, Մերձավոր Արևելքից և Չինաստանից նոր ներդրողների և կապիտալի աղբյուրների ակտիվացմանը, ինչպես նաև պարտքի, կապիտալի և հիբրիդային ֆինանսավորման ժամանակակից կառուցվածքներին՝ հիմնված միջսահմանային գործարքների իրական փորձի վրա։

Լեզու՝ ռուսերեն

Կլոր սեղան-քննարկում՝ նվիրված Հայաստանի տնտեսական հեռանկարներին, միջազգային առևտրային գործընթացներին և երկրի զարգացող դերին՝ գլոբալ առևտրում։ Միջոցառումը համախմբում է պետական, մասնավոր և միջազգային ոլորտների առաջատարներին՝ ազգային առաջնահերթությունները, կայուն աճի հնարավորությունները և գլոբալ ինտեգրման ռազմավարությունները քննարկելու նպատակով։

Կլոր սեղան-քննարկում՝ նվիրված տեխնոլոգիաների և թվային լուծումների հեղափոխական ազդեցությանը միջազգային առևտրի զարգացումների վրա։ Նորարարական ծառայություններ և գործիքներ, որոնք նպաստում են սահմաններից դուրս գործառույթների պարզեցմանը, արդյունավետության բարձրացմանը և բիզնեսների աջակցությանը։

Անդրադարձ՝ ժամանակակից կինոարտադրության տրամաբանության, ֆիլմերի ֆինանսավորման մեխանիզմների, կոմերցիոն ու արտհաուս հաջողությունը ձևավորող գործոնների, ինչպես նաև ոլորտում Հայաստանի առանձնահատուկ մարտահրավերների ու ձեռքբերումների։ Հայտնի կինոռեժիսոր Իննա Սահակյանը կներկայացնի, թե ինչպես է գործում գլոբալ կինոարտադրության էկոհամակարգը։

Կլոր սեղան-քննարկում WTC Երևան նախագծի կառավարման խորհրդատու Colliers Project Leaders-ի հետ համատեղ՝ նվիրված նախագծերի կառավարման խորհրդատուների ազդեցությանը խոշոր շինարարական նախագծերի հաջող իրականացման, ծախսերի արդյունավետ կառավարման և ռիսկերի նվազեցման հարցում։